திரை

உறுமி நகரும் ஜன்னலின்

கண்ணாடிப் பரப்பில்

புலப்படாத தூரிகை ஒன்று

வரைந்து நகர்கிறது

உயர்ந்து, சரிந்து, விழுந்து வளைந்து ஓடும் 

ஒற்றைக் கோட்டினை

அதன் கீழும் மேலும் 

ஒரே நிறம் 

இழந்த சொற்கள்

முடிவிலிகளின் இடைக்கிடக்கும்

காலத்தின் ஒரு தூய புள்ளியில் 

நிகழ்ந்த சந்திப்பு

பெயர்தெரியா மரத்தின் கிளையில்

பேசி இருந்தது வனக் குருவி 

தன இனத்தின்

எப்போதைக்குமான 

ஒரே மொழியின் சொற்களை

மானுட பாசைகளின் சொற்கள்  

அவிந்து மிஞ்சிய 

மெளனத்தில் 

மீண்டும் ஒருமொழி துவங்கினால்

புரியக் கூடும்